喺古城市集掃完貨，已經黃昏，行到Djemaa el_Fna大廣場，好熱鬧。呢個大廣場日頭有好多人賣藝，例如玩蛇玩馬騮同賣假牙等等，到咗夜晚五點之後就係平民飯堂，有超過二三十檔大排檔賣當地0野食。
我地見到有沙律、燒雞、烤羊、Pizza、意粉等正常菜，亦有0的當地奇異0野食，例如蝸牛湯，一碗HK$5，見0的人攞住牙籤撩隻有頭有觸角的蝸牛出來吃，仲要飲埋0的湯，我試食咗一隻，好重胡椒味，不過個賣相太恐怖，所以我地轉食片羊頭。
片羊頭檔好受當地人歡迎，一碟HK$15，配麵包等你可以沾0的肉汁連埋羊片一齊食，juicy又好味。之後我地仲食咗甜到死的薑餅甜品同飲咗暖胃0既肉桂茶。
返到酒店，我地仲食埋之前喺大市集甜品檔買的當地甜點，個檔口好搞笑，檔檔都係有個男人企喺檔中間，被好多好多五顏六色的餅仔糕點圍住，我地同佢講要半公斤/HK$50，佢就每樣執0的俾我地，導遊話0的甜點係用杏仁、肉桂、開心果、核桃等加上麵粉同糖來整，雖然款款外型都唔同，不過食落口都係差不多味，都係甜甜地同脆脆地，唔難食，去到摩洛哥0既話應該試下。
登入