波蘭遊Great Masurian Lake(一)

今次係第三次去波蘭，之前兩次都係冬天去，今次終於等到夏天，可以一遊波蘭人消暑兼度假嘅Great Masurian Lake。呢個Great Masurian Lake由好多個大大小小湖組成，好多香港人都未聽過呢個地方，但其實係本地人夏天去sailing同釣魚嘅熱門地。佢地通常都會租艘遊艇，然後玩番一個星期。
 




好彩我個波蘭朋友係旅行社老闆，所以由租船到搵人揸艇都由佢安排。佢話如果旺季七八月去，要起碼三四個月之前租定船，仲一定要租七日以上，我地六月頭去，就可以租三日。我地五個人再加一個船長，三日兩夜每人大概千幾蚊港紙，一0的都唔貴。


第一日我地由首都華沙揸車出發，三個鐘車程去到Gizycko鎮攞船，上船之前我地仲去超市掃貨，買定鮮魚、腸仔、麵包同即食麵做三餐。




 






我地隻船唔算豪華，只可以容納六個人，船艙中間有張檯，圍住係梳化，夜晚瞓覺就開大張梳化，我地仲要自己帶睡袋添。船艙仲有簡單的煮食爐，不過就無廁所同浴室，所以夜晚我地就會泊架船0係碼頭，然後上岸去公共浴室俾錢沖涼，估唔到0的浴室同廁所乾淨又先進，超正。碼頭仲有餐廳同酒吧，夜晚可以去飲酒吹水。