印度小島Bangaram

一生人裡面可以去好多地方旅遊，我覺得自己真係好幸福，不過最最最幸運0既係可以有機會踏足印度呢個比馬爾代夫有過之而無不及0既隱世小島Bangaram邦加蘭島。
 
Bangaram0係印度西南面，要由Kochi搭小型飛機去，架飛機得12個位咋。呢個群島叫做Lakshadweep省或Laca Dives，而Bangaram係35個小島其中一個，由於印度政府採取保護政策，當中只有兩個島開放比外國遊客。Bangaram島上就只有一間好簡陋0既所謂酒店，得30間房，最多住60人。如果外國遊客想入島，仲要向印度政府申請添。




我由Kochi飛到其中一個有當地人定居0既小島Agatti，再搭酒店安排0既船，坐一個半鐘先去到小島，沿途0既風景真係好似去左天堂一樣，0的海水清到隨便看下望都見到有海龜游緊水。




酒店係由磚建0既平房屋組成，中間係餐廳、閱讀室、潛水店，前面就係沙灘，房裡面無冷氣，只有風扇，好彩夜晚目訓覺都唔熱。房間設備就好似hostel一樣，只有床同檯椅，超級原始，廁所無熱水，亦因為0的水來自地下，好勁硫磺味，每次沖涼都要開0的水出來等廿分鐘，無味先開始沖。雖然有好多唔方便0既地方，不過呢度係我去過最最最最靚最無污染0既地方，潛水見到0既珊瑚同魚亦係最靚0既，無一處地方可以比得上。



 

最神奇0既係因為呢度污染極小，所以夜晚0係沙灘可以見到一種發藍光0既水中生物，潛水教練話呢種小生物要0係好乾淨0既水先生存到，尾部會發光，隨住海水沖上沙灘，所以個沙灘就遍地發出小藍光，好似地上面0既銀河星宿一樣，係我見過最靚0既景象之一。